Ffayinolo y’omupiira gw’amasaza 2024 yakunyumira abalabi e Namboole nga batabani ba Ssekiboobo ab’essaza Kyaggwe battunka n’aba Ppookino ab’essaza ly’e Buddu.
Bannakyaggwe bawera nkolokooti nti Buddu bukyanga erya myungu, leero eridde butanga, anti mbu Katonda waabwe abavuddemu, katisa abasudde ku Bakunja, eby’okubala ekikopo eky’okuna kye kiseera babifuuwe ku nninga kuba bbo luutu eno ne Katonda waabwe wali mu Ggulu e Mukono, ku kitebe ekikulu eky’essaza akimanyi nti bagenda kuwanika ekikopo ky’amasaza ekisooka.
Ababiri bano okutuuka ku ffayinolo kiddiridde Kyaggwe okugwa amaliri ne ttiimu ya Buweekula e Mubende nga teri alengedde katimba ka munne nga wano Kyaggwe ayitiddewo ku mugatte gwa ggoolo 2-1.
Ate bbo Bannabuddu ku mupiira ogubadde ku Kitovu Sports Arena nabo bagudde maliri ku ggoolo emu kw’emu olwo Buddu n’eyitawo ku ggoolo 4-2.
Kyaggwe eriyambalagana ne Buddu e Namboole nga November 2, 2024, Buddu egoba kutwala kikopo kya kusatu ate Kyaggwe guno gwe mukisa gw’erina gwokka okufunayo ekikopo ekisooka bukyanga mpaka z’amasaza zitandikibwa.
The post Kyaggwe Ya Kuttunka na Buddu ku Ffayinolo Z’amasaza e Namboole appeared first on Kyaggwe TV.