BYA TONNY EVANS NGABO
| KAMPALA | KYAGGWE TV | Minisitule y’amazzi n’obutondebwensi mu ggwanga eri mu kattu olw’ekizibu ky’ebbbula ly’amazzi mu bitundu by’eggwanga eby’enjawulo nga kino kisinga kukosa bakyala n’abaana. Mu kadde kano, minisitule ekola bwezizingirire okulaba nga ekizibu kino kigonjoolwa.
Okusinziira ku bibalo, Banayuganda abawerera ddala obukadde 12 abawangaalira mu byalo nga bakola ebitundu 33 ku buli 100 bakaluubirirwa okufuna amazzi amayonjo sso ng’ate bbo ab’omubibuga bakola ebitundu 27 ku 100 nga bano okugafuna bamala kutunda bulamu.
Mu ngeri y’emu ebyalo 14,391 okwetoloola eggwanga kikakasiddwa nga ababibeerako basanga obuzibu okufuna amazzi amayonjo ekiteekawo obunkenke obw’amaanyi mu ggwanga.
Bino byatuukiddwako mu nsisinkano y’ebitongole bya gavumenti ebikwatibwako ensonga z’amazzi mu nteekateeka eyategekeddwa ekitongole ekitakabanira eddembe ly’abakyala n’obutondebwensi ekya Action for Rural Women’s Empowerment (ARUWE) eyabadde ku Hotel Africana. Ensisinkano eno yeetabiddwamu n’abakulembeze okuva mu disitulikiti y’e Wakiso ne Kampala nga bano baabadde basala amagezi ku butya bwe bayinza okutaasa obutondebwensi wamu n’eddembe ly’abakyala.
Catherine Muhumuza omukungu okuva mu minisitule y’amazzi n’obutondebwensi agamba nti gavumenti eri mu kawefube ow’okulaba ng’ekizibu ky’amazzi kifuuka lufumo mu bitundu by’eggwanga eby’enjawulo okulaba ng’abakyala n’abaana naddala ab’obuwala bawona okutindigganga engendo empanvu nga banoonya amazzi amayonjo.
Ye Paddy Galabuzi avunaanyizibwa ku kuteekerateekera disitulikiti y’e Wakiso agamba nti nabo ng’ab’e Wakiso essira balitadde ku kutaasa obutondebwensi ng’ebitundu 30 ku buli 100 ku nsimbi ze baafuna okuva mu bbanka y’ensi yonna wamu n’ez’embalirira ya disitulikiti baazitadde mu kutaasa butondebwansi.
Ate ye Nakanyike Sylvia Mukasa eyakiikiridde ekitongole kya ARUWE yasabye gavumenti naddala minisitule y’amasanyalaze n’obuggaga obw’ensibo okwongera okulowooza ku nsonga y’okukendeeza ku bbeeyi y’amasanyalaze eri waggulu. Nakanyike agamba nti eno y’engeri yokka eggya okuyambako abakyala okukomya okwenyigira mu kutyoboola obutondebwensi nga bayita mu kunoonya enku n’amanda eby’okufumbisa.
The post Ebbula Ly’amazzi Lyeyongedde Olw’obutonde Bw’ensi Obususse Okwonoonebwa appeared first on Kyaggwe TV.