Bammemba ba Rotary Club of Mukono nga bali ne bannaabwe aba Rotary Club of Namilyango beegasse n’ekitongole ekikungaanya omusaayi ekya Nakasero Blood Bank ne bateekawo kaweefube mwe bakungidde abantu ne beenyigira mu kugaba omusaayi.
Enteekateeka eno yeenyigiddemu bammemba ba lotale ssaako abatuuze ab’enjawulo ab’e Mukono abaagabye omusaayi mu nkola eya kyeyagalire. Bano enkambi bagikubye ku ddwaliro lya Mukono Church of Uganda Hospital mu kibuga ky’e Mukono.
Gerald Ssessaazi nga ye Pulezidenti wa Rotary Club y’e Mukono agambye nti ensonga eno baagiwomyemu omutwe ng’omu ku kaweefube waabwe nga lotale okulaba ng’abakyala abazaala n’abaana be bazaala tebafa mu nteekateeka eyo olw’ebbula ly’omusaayi.
Ssessaazi ategeezezza nti nga bakolagana n’eddwaliro lya Mukono General Hospital, baazimba ekisenge abavubuka abato ababa bafunye embuto mwe balabira abasawo nga kino kyakolebwa oluvannyuma lw’okukizuula nti abamu baali bakaluubirirwa okugenda mu ddwaliro nga bafunye embuto nga batya okusimba mu nnyiriri n’abakyala abakulu abali mu myaka gya bamaama baabwe.
Bano we baafundikiridde olunaku nga bakungaanyizza ‘unit’ z’omusaayi 104.
Florence Mirembe nga mmemba mu lotale e Mukono akunze Bannamukono ne Bannayuganda bonna okutwalira ewamu okwenyigira mu nteekateeka y’okugaba omusaayi kuba gwa mugaso nnyo eri obulamu bw’abantu wadde ng’ate tegulina dduuka gye gugulibwa.
Mirembe agambye nti era bali ne mu kaweefube wa kunoonya nsimbi ezisoba mu bukadde 11 okugula ebikozesebwa bye banaagabira eddwaliro lya Mukono General Hospital okwongera okutereeza embeera za bamaama naddala abatiini mwe bazaalira.
Angella Kakooza nga y’omu ku bagambye omusaayi yalaze okunyolwa n’agamba nti wadde ng’okugaba omusaayi bakikolera bwereere, ate eriyo amalwaliro agagutunda ate ku buseere n’agamba nti kino kikyamu.
The post Aba Rotary Club of Mukono Bakulembeddemu Okugaba Omusaayi appeared first on Kyaggwe TV.